Կյանքը սահմանի եզրին

Life on the edge of the border

Կյանքը սահմանի եզրին

Life on the edge of the border

ՃԱՄԲԱՐԱԿ ԳՅՈՒՂԳեղարքունիքի մարզ

ՍՈԿՐԱՏ. «ԵՐԱԶՈՒՄ ԵՄ ԻՆՁ ՀԵՌՈՒՍՏԱՑՈՒՅՑՈՎ ՑՈՒՅՑ ՏԱՆ, ԾՆՈՂՆԵՐՍ ՏԵՍՆԵՆ՝ ՀՊԱՐՏԱՆԱՆ»

12- ամյա Սոկրատն ապրում է Գեղարքունիքի մարզի սահմանամերձ Ճամբարակ գյուղում: Նա շատ շնորհալի տղա է, 7 տարեկանից շվի է նվագում, այժմ արդեն նաեւ դուդուկ եւ դհոլ. «Որոշել եմ, որ դպրոցն ավարտեմ, ընդունվեմ քոլեջ՝ ժողգործիքների բաժին, որպեսզի ուսումնասիրեմ ժողովրդական գործիքները: Փոքր ժամանակ նկարչական խմբակ եմ գնացել, սպորտով եմ զբաղվել, բայց ի վերջո հասկացել եմ, որ երաժշտությունն է իմը: Երազում եմ, որ իմ ծնողները, տատիկը, պապիկը, բարեկամներն ինձ հեռուստացույցով տեսնեն՝ արտասահամանում նվագելուց ու հպարտանան: Ուզում եմ, որ այդ երազանքս շուտ իրականանա: Ես չեմ մեծամտանում, որ դասատուս ինձ գովում է: Ես շատ համեստ եմ»:

Սոկրատը դուդուկով «Դլե Յաման» է կատարում, եւ ունկնդիրները հուզվում են նրա նվագից. «Մի քանի տարի առաջ Գյումրիում փառատոնի եմ մասնակցել՝ շվի եմ նվագել եւ երրորդ տեղը գրավել:

Շուտով էլ մեկնելու եմ Վրաստան՝ միջազգային փառատոնի մասնակցելու, փորձելու եմ առաջին տեղը գրավել»:

Սոկրատը շատ կուզեր, որ իր Ճամբարակում երաժշտական քոլեջ լիներ, այդ դեպքում ինքն էլ չէր հասնի Երեւան՝ ուսումը շարունակելու համար. « Ես իմ գյուղը սիրում եմ, ամեն մեկի համար իր գյուղը ամեն ինչից վեր  է, ոչ մի տեղ ինձ այնքան երջանիկ չեմ զգա, ինչքան իմ գյուղում: Ես սիրում եմ մեր սարերը բարձրանալ ու այնտեղ շվի  նվագել: Մենք սահմանամերձ ենք, գիտեմ, որ սահմանից այն կողմ Ադրբեջանն է, մեր սարերի հետեւում հայկական ու ադրբեջական «պոստեր» են»:

Սակայն Սոկրատի հոգում փշալարեր չկան. «Օրինակ, ինձ հետաքրքիր կլիներ այնտեղ ապրող մի երեխայի հետ դուետ նվագեի, ու երկուսով էլ ճանաչում ունենայինք, իրարից ինչ-որ բաներ սովորեինք… »:

Նա շատ երազանքներ ունի եւ գնում է իր երազանքների հետեւից. «Ուզում եմ կլառնետ ու զուռնա նվագել էլ սովորեմ, լավ երաժշտական գործիքներ ունենամ, հյուրախաղեր ունենամ Ռուսաստանում, Ամերիկայում, Վրաստանում… »: Բոլոր տոներից ամենաշատը Ամանորն է սիրում. « Նոր տարվա գիշերը բոլորը սարերին անվադողեր են այրում ու գիշերով սարերը լուսավորվում են: Շատ սիրուն է լինում, սալյուտի նման»:

Սոկրատի մասին պատմող պատկերապատումը

Պատկերապատումն` Աստղիկ Հարությունյանի

Պատրաստված է «Կյանքը սահմանի եզրին» նախագծի համար